အချစ်လားဟေ့ ဝင်ခဲ့လေကွယ်

သော့ခတ်ထားတဲ့ သံမဏိတံခါးကို လာခေါက်တယ်။ သွယ်လျတဲ့ လက်ချောင်းကလေးတွေရှိတဲ့ ပန်းနုရောင် လက်သည်းကလေးတွေရှိတဲ့ ရွှေဝါရောင် မွေးညင်းကလေးတွေရှိတဲ့ လက်ကလေးမှန်း ဒီကလည်း သိလိုက်ပါရဲ့။ သွေးတွေကို ခဲသွားစေတဲ့ ဦးနှောက်တွေကို ဆူဝေလာစေတဲ့ ခြေဖျားလက်ဖျားတွေကို အအေးမိစေတဲ့ နှလုံးသားကို ချွေးစို့လာစေတဲ့သူဟာ “မင်း”ရယ် “အမုန်းရယ်” နှစ်ယောက်ပဲရှိတယ်။ ခု- “အမုန်း” ဟာ ခရီးလွန်နေတယ်ဆိုတော့ တံခါးကို လာခေါက်တဲ့သူဟာ မင်းပဲဖြစ်ရမယ်ဆိုတာ ဒီကလည်း သိလိုက်ပါရဲ့။ “အချစ်လားဟေ့ ၀င်ခဲ့လေကွယ်”။ ။

မင်းလူ

ဘီလူးမရဲ့ဆောင်း

ပန်းကြွေရင် မြေပေါ်ကျပေမယ့်
ကြယ်ကြွေတဲ့အခါ
ဘယ်သူ့ရင်ခွင်ပေါ်ကျသလဲ ...။


ငါကတော့
ဘီလူးမရဲ့ ရင်ခွင်မှာမှ
ဆောင်းခိုခဲ့မိသူပါ ...။


မနေ့ကတင် အကောင်းကြီးရှိသေးတယ်
ငါ ဘာကြောင့် အရောင်ကန်းသွားရတာလဲ ?


ဘီလူးမရေ ...
အိမ်မက်ဆိုတာ
ကိုယ့်စိတ်ကူးတွေက ကိုယ့်ကို ပြန်ပြောပြတဲ့ ပုံပြင်ပေါ့

မင်းရဲ့လက်သည်းခွံတွေကို အရောင်ခြယ်ဖို့အတွက်
ငါဟာ ဆိုးဆေးတစ်ပုလင်း ဖြစ်ခဲ့ပါသလား။


ငါ့ကို (လက်သည်းဆိုးဆေးလို)
ဆိုးလွယ် ဖျက်လွယ် သဘောမထားပါနဲ့၊
ငါ့အိပ်မက်တွေက
မင်းကို ကျိန်ဆဲကြလိမ့်မယ်။